تکبیر تشریق

 تکبیر تشریق:

       بقر عید کے ایام میں تکبیر مشروع ہے یعنی ہر فرض نماز کے بعد ایک مرتبہ پڑھیں ۔

اَللهُ أكبَرُاَللهُ اَكبَرُ لَآ  اِلٰہَ اِ لَّا اللہُ وَاللہُ اَکبَرُ وَ ِلِلّٰہِ الحَمدُ۔

مرد زور سے پڑھیں ،عورتیں آہستہ سے پڑھیں نویں تاریخ کی فجر کی نماز سے لے کر تیرھویں تاریخ کی عصر تک یہ تکبیر ہر فرض نماز کے بعد پڑھی جاۓ سلام پھیر کر فوراً پڑھیں۔

عشرہ ذی الحجہ کی فضیلتThe virtues of the ten days of Dhul-Hijjah

     حضرت عبداللہ بن عباسؓ  سے روایت ہے کہ حضورﷺ نے ارشاد فرمایا کہ بقر عید کے دس دنوں میں جس قدر نیک عمل اللہ کو محبوب ہے اس سے بڑھ کر کسی زمانہ میں اس قدر محبوب نہیں  (یعنی یہ دن فضیلت میں دیگر ایام سے بڑھے ہوۓ ہیں ) صحابہ نے عرض کیا ،یا  رسول اللہﷺ! کیا جہاد فی سبیل اللہ بھی ان کی عبادت سے افضل نہیں ہے آپ ﷺ نے ارشاد فرمایا :جہاد فی سبیل اللہ بھی ان ایام سے افضل نہیں، الا یہ کہ کوٸی شخص اپنی جان و مال لے کر نکلے اور ان میں سے کچھ بھی واپس لے کر نہ لوٹے۔ 

          (مشکوة المصابیح 128بحوالہ بخاری)

     حضرت ابو ہریرہ ؓ  سے روایت ہے کہ حضور اقدس ﷺ نے ارشاد فرمایا کہ بقر عید کے اول دس دنوں میں روزہ رکھنے سے ایک روزہ کا ثواب ایک سال کے روزوں کے برابر ملتا ہے اور ان دنوں کی راتوں میں قیام کرنے سے شب قدر میں قیام کے برابر ثواب ملتا ہے۔

 (مشکوة المصابیح ص 128 بحوالہ ترمزی)

     علماء نے بتایا ہے کہ رمضان کے آخری عشرہ کی راتیں افضل ہیں اور عشرہ ذی الحجہ کے دن افضل ہیں کیونکہ ان میں یوم عرفہ بھی ہے۔رمضان کا آخری عشرہ ہو یا ذی الحجہ کا پہلا عشرہ ان میں رات دن عبادت میں لگنا چاہٸے کیونکہ ان دونوں کی ہر گھڑی بہت مبارک ہے۔

     حضرت ابو قتادہؓ  سے روایت ہے کہ محبوب رب العالمین ﷺ نے بقر عید کی نویں تاریخ کے روزہ کے بارے میں فرمایا کہ میں اللہ پاک سے پختہ امید رکھتا ہوں کہ اس کی وجہ سے ایک سال پہلے اور ایک سال بعد کے گناہوں کا کفارہ فرما دیں گے اور فرمایا کہ محرم کی دسویں تاریخ کے روزہ میں اللہ تعالی سے پختہ امید رکھتا ہوں کہ اس کی وجہ سے ایک سال پہلےکے گناہوں کا کفارہ فرما دیں گے۔( مسلم شریف)